🪷 Mahābhārata · Strī-Parva · Chapter 26

The Book of the Women · Parva 11 · 44 unique Sanskrit addresses · pinned Critical Edition-derived witness

The Devanāgarī Yathārtha · 44 Shlokas

MBh 11.26.1
वासुदेव उवाच उत्तिष्ठोत्तिष्ठ गान्धारि मा च शोके मनः कृथाः तवैव ह्यपराधेन कुरवो निधनं गताः
MBh 11.26.2
या त्वं पुत्रं दुरात्मानमीर्षुमत्यन्तमानिनम् दुर्योधनं पुरस्कृत्य दुष्कृतं साधु मन्यसे
MBh 11.26.3
निष्ठुरं वैरपरुषं वृद्धानां शासनातिगम् कथमात्मकृतं दोषं मय्याधातुमिहेच्छसि
MBh 11.26.4
मृतं वा यदि वा नष्टं योऽतीतमनुशोचति दुःखेन लभते दुःखं द्वावनर्थौ प्रपद्यते
MBh 11.26.5
तपोर्थीयं ब्राह्मणी धत्त गर्भं; गौर्वोढारं धावितारं तुरंगी शूद्रा दासं पशुपालं तु वैश्या; वधार्थीयं त्वद्विधा राजपुत्री
MBh 11.26.6
वैशंपायन उवाच तच्छ्रुत्वा वासुदेवस्य पुनरुक्तं वचोऽप्रियम् तूष्णीं बभूव गान्धारी शोकव्याकुललोचना
MBh 11.26.7
धृतराष्ट्रस्तु राजर्षिर्निगृह्याबुद्धिजं तमः पर्यपृच्छत धर्मात्मा धर्मराजं युधिष्ठिरम्
MBh 11.26.8
जीवतां परिमाणज्ञः सैन्यानामसि पाण्डव हतानां यदि जानीषे परिमाणं वदस्व मे
MBh 11.26.9
युधिष्ठिर उवाच दशायुतानामयुतं सहस्राणि च विंशतिः कोट्यः षष्टिश्च षट्चैव येऽस्मिन्राजमृधे हताः
MBh 11.26.10
अलक्ष्याणां तु वीराणां सहस्राणि चतुर्दश दश चान्यानि राजेन्द्र शतं षष्टिश्च पञ्च च
MBh 11.26.11
धृतराष्ट्र उवाच युधिष्ठिर गतिं कां ते गताः पुरुषसत्तमाः आचक्ष्व मे महाबाहो सर्वज्ञो ह्यसि मे मतः
MBh 11.26.12
युधिष्ठिर उवाच यैर्हुतानि शरीराणि हृष्टैः परमसंयुगे देवराजसमाँल्लोकान्गतास्ते सत्यविक्रमाः
MBh 11.26.13
ये त्वहृष्टेन मनसा मर्तव्यमिति भारत युध्यमाना हताः संख्ये ते गन्धर्वैः समागताः
MBh 11.26.14
ये तु संग्रामभूमिष्ठा याचमानाः पराङ्मुखाः शस्त्रेण निधनं प्राप्ता गतास्ते गुह्यकान्प्रति
MBh 11.26.15
पीड्यमानाः परैर्ये तु हीयमाना निरायुधाः ह्रीनिषेधा महात्मानः परानभिमुखा रणे
MBh 11.26.16
छिद्यमानाः शितैः शस्त्रैः क्षत्रधर्मपरायणाः गतास्ते ब्रह्मसदनं हता वीराः सुवर्चसः
MBh 11.26.17
ये तत्र निहता राजन्नन्तरायोधनं प्रति यथा कथंचित्ते राजन्संप्राप्ता उत्तरान्कुरून्
MBh 11.26.18
धृतराष्ट्र उवाच केन ज्ञानबलेनैवं पुत्र पश्यसि सिद्धवत् तन्मे वद महाबाहो श्रोतव्यं यदि वै मया
MBh 11.26.19
युधिष्ठिर उवाच निदेशाद्भवतः पूर्वं वने विचरता मया तीर्थयात्राप्रसङ्गेन संप्राप्तोऽयमनुग्रहः
MBh 11.26.20
देवर्षिर्लोमशो दृष्टस्ततः प्राप्तोऽस्म्यनुस्मृतिम् दिव्यं चक्षुरपि प्राप्तं ज्ञानयोगेन वै पुरा
MBh 11.26.21
धृतराष्ट्र उवाच येऽत्रानाथा जनस्यास्य सनाथा ये च भारत कच्चित्तेषां शरीराणि धक्ष्यन्ति विधिपूर्वकम्
MBh 11.26.22
न येषां सन्ति कर्तारो न च येऽत्राहिताग्नयः वयं च कस्य कुर्यामो बहुत्वात्तात कर्मणः
MBh 11.26.23
यान्सुपर्णाश्च गृध्राश्च विकर्षन्ति ततस्ततः तेषां तु कर्मणा लोका भविष्यन्ति युधिष्ठिर
MBh 11.26.24
वैशंपायन उवाच एवमुक्तो महाप्राज्ञः कुन्तीपुत्रो युधिष्ठिरः आदिदेश सुधर्माणं धौम्यं सूतं च संजयम्
MBh 11.26.25
विदुरं च महाबुद्धिं युयुत्सुं चैव कौरवम् इन्द्रसेनमुखांश्चैव भृत्यान्सूतांश्च सर्वशः
MBh 11.26.26
भवन्तः कारयन्त्वेषां प्रेतकार्याणि सर्वशः यथा चानाथवत्किंचिच्छरीरं न विनश्यति
MBh 11.26.27
शासनाद्धर्मराजस्य क्षत्ता सूतश्च संजयः सुधर्मा धौम्यसहित इन्द्रसेनादयस्तथा
MBh 11.26.28
चन्दनागुरुकाष्ठानि तथा कालीयकान्युत घृतं तैलं च गन्धांश्च क्षौमाणि वसनानि च
MBh 11.26.29
समाहृत्य महार्हाणि दारूणां चैव संचयान् रथांश्च मृदितांस्तत्र नानाप्रहरणानि च
MBh 11.26.30
चिताः कृत्वा प्रयत्नेन यथामुख्यान्नराधिपान् दाहयामासुरव्यग्रा विधिदृष्टेन कर्मणा
MBh 11.26.31
दुर्योधनं च राजानं भ्रातॄंश्चास्य शताधिकान् शल्यं शलं च राजानं भूरिश्रवसमेव च
MBh 11.26.32
जयद्रथं च राजानमभिमन्युं च भारत दौःशासनिं लक्ष्मणं च धृष्टकेतुं च पार्थिवम्
MBh 11.26.33
बृहन्तं सोमदत्तं च सृञ्जयांश्च शताधिकान् राजानं क्षेमधन्वानं विराटद्रुपदौ तथा
MBh 11.26.34
शिखण्डिनं च पाञ्चाल्यं धृष्टद्युम्नं च पार्षतम् युधामन्युं च विक्रान्तमुत्तमौजसमेव च
MBh 11.26.35
कौसल्यं द्रौपदेयांश्च शकुनिं चापि सौबलम् अचलं वृषकं चैव भगदत्तं च पार्थिवम्
MBh 11.26.36
कर्णं वैकर्तनं चैव सहपुत्रममर्षणम् केकयांश्च महेष्वासांस्त्रिगर्तांश्च महारथान्
MBh 11.26.37
घटोत्कचं राक्षसेन्द्रं बकभ्रातरमेव च अलम्बुसं च राजानं जलसंधं च पार्थिवम्
MBh 11.26.38
अन्यांश्च पार्थिवान्राजञ्शतशोऽथ सहस्रशः घृतधाराहुतैर्दीप्तैः पावकैः समदाहयन्
MBh 11.26.39
पितृमेधाश्च केषांचिदवर्तन्त महात्मनाम् सामभिश्चाप्यगायन्त तेऽन्वशोच्यन्त चापरैः
MBh 11.26.40
साम्नामृचां च नादेन स्त्रीणां च रुदितस्वनैः कश्मलं सर्वभूतानां निशायां समपद्यत
MBh 11.26.41
ते विधूमाः प्रदीप्ताश्च दीप्यमानाश्च पावकाः नभसीवान्वदृश्यन्त ग्रहास्तन्वभ्रसंवृताः
MBh 11.26.42
ये चाप्यनाथास्तत्रासन्नानादेशसमागताः तांश्च सर्वान्समानाय्य राशीन्कृत्वा सहस्रशः
MBh 11.26.43
चित्वा दारुभिरव्यग्रः प्रभूतैः स्नेहतापितैः दाहयामास विदुरो धर्मराजस्य शासनात्
MBh 11.26.44
कारयित्वा क्रियास्तेषां कुरुराजो युधिष्ठिरः धृतराष्ट्रं पुरस्कृत्य गङ्गामभिमुखोऽगमत्

🪷 The Honest Framing

This chapter belongs to the source-pinned BORI Critical Edition-derived digital witness. Its unique addresses are publicly readable and indexable; this remains a digital-witness claim, not a claim that every Mahābhārata recension agrees word-for-word or that the traditional 100,000-verse extent is represented here.

Navigation

Sources and Connected Readings

Continue from these 44 source-pinned Devanāgarī addresses to Strī-Parva, the Mahābhārata reading map, and any exact Bhagavad-Gītā correspondence.

MBh 11.26local chapter route · Strī-ParvaStrī-Parvaparent Parva chapter index/mahabharata18-parva Sanskrit reading index with edition and address notesBhīṣma-ParvaMahābhārata Parva 6 · the Gītā lives in chapters 23-40MBh 6.23Bhagavad-Gītā chapter 1 in its Itihāsa homeMBh 6.40Bhagavad-Gītā chapter 18 in its Itihāsa homeRāmopākhyānaVana-Parva 258 · Vyāsa narrates the Rāma-kathā inside Krishna's epicNārāyaṇīyamŚānti-Parva 335 · Nārāyaṇa/Krishna/Viṣṇu/Vāsudeva unity witness/bhagavad-gitadeep Gītā corpus with translations, commentaries, and verse-level anchorsBG 1.1Dharma-kṣetra opening cross-anchored to MBh 6.23.1BG 18.66Carama-Śloka surrender seal inside the Bhīṣma-Parva arcVyāsa vibhūtiBG 10.37 · Krishna names Vyāsa among munisBG 10.37Vyāsa and Dhanañjaya as Krishna-vibhūti source routeŚB 1.2.11Brahman · Paramātmā · Bhagavān as one advaya-tattvaŚB 1.3.28kṛṣṇas tu bhagavān svayam · Vyāsa corpus source seal/binduDiamond of Darśanas · Itihāsa as one Bindu aperture/philosophyKrishna = Paramaatma = Parabrahman constitutional foundation

🪷 जय व्यास भगवान् 🪷