🪷 Mahābhārata · Droṇa-Parva · Chapter 93

The Book of Droṇa · Parva 7 · 35 unique Sanskrit addresses · pinned Critical Edition-derived witness

The Devanāgarī Yathārtha · 35 Shlokas

MBh 7.93.1
संजय उवाच काल्यमानेषु सैन्येषु शैनेयेन ततस्ततः भारद्वाजः शरव्रातैर्महद्भिः समवाकिरत्
MBh 7.93.2
स संप्रहारस्तुमुलो द्रोणसात्वतयोरभूत् पश्यतां सर्वसैन्यानां बलिवासवयोरिव
MBh 7.93.3
ततो द्रोणः शिनेः पौत्रं चित्रैः सर्वायसैः शरैः त्रिभिराशीविषाकारैर्ललाटे समविध्यत
MBh 7.93.4
तैर्ललाटार्पितैर्बाणैर्युयुधानस्त्वजिह्मगैः व्यरोचत महाराज त्रिशृङ्ग इव पर्वतः
MBh 7.93.5
ततोऽस्य बाणानपरानिन्द्राशनिसमस्वनान् भारद्वाजोऽन्तरप्रेक्षी प्रेषयामास संयुगे
MBh 7.93.6
तान्द्रोणचापनिर्मुक्तान्दाशार्हः पततः शरान् द्वाभ्यां द्वाभ्यां सुपुङ्खाभ्यां चिच्छेद परमास्त्रवित्
MBh 7.93.7
तामस्य लघुतां द्रोणः समवेक्ष्य विशां पते प्रहस्य सहसाविध्यद्विंशत्या शिनिपुंगवम्
MBh 7.93.8
पुनः पञ्चाशतेषूणां शतेन च समार्पयत् लघुतां युयुधानस्य लाघवेन विशेषयन्
MBh 7.93.9
समुत्पतन्ति वल्मीकाद्यथा क्रुद्धा महोरगाः तथा द्रोणरथाद्राजन्नुत्पतन्ति तनुच्छिदः
MBh 7.93.10
तथैव युयुधानेन सृष्टाः शतसहस्रशः अवाकिरन्द्रोणरथं शरा रुधिरभोजनाः
MBh 7.93.11
लाघवाद्द्विजमुख्यस्य सात्वतस्य च मारिष विशेषं नाध्यगच्छाम समावास्तां नरर्षभौ
MBh 7.93.12
सात्यकिस्तु ततो द्रोणं नवभिर्नतपर्वभिः आजघान भृशं क्रुद्धो ध्वजं च निशितैः शरैः सारथिं च शतेनैव भारद्वाजस्य पश्यतः
MBh 7.93.13
लाघवं युयुधानस्य दृष्ट्वा द्रोणो महारथः सप्तत्या सात्यकिं विद्ध्वा तुरगांश्च त्रिभिस्त्रिभिः ध्वजमेकेन विव्याध माधवस्य रथे स्थितम्
MBh 7.93.14
अथापरेण भल्लेन हेमपुङ्खेन पत्रिणा धनुश्चिच्छेद समरे माधवस्य महात्मनः
MBh 7.93.15
सात्यकिस्तु ततः क्रुद्धो धनुस्त्यक्त्वा महारथः गदां जग्राह महतीं भारद्वाजाय चाक्षिपत्
MBh 7.93.16
तामापतन्तीं सहसा पट्टबद्धामयस्मयीम् न्यवारयच्छरैर्द्रोणो बहुभिर्बहुरूपिभिः
MBh 7.93.17
अथान्यद्धनुरादाय सात्यकिः सत्यविक्रमः विव्याध बहुभिर्वीरं भारद्वाजं शिलाशितैः
MBh 7.93.18
स विद्ध्वा समरे द्रोणं सिंहनादममुञ्चत तं वै न ममृषे द्रोणः सर्वशस्त्रभृतां वरः
MBh 7.93.19
ततः शक्तिं गृहीत्वा तु रुक्मदण्डामयस्मयीम् तरसा प्रेषयामास माधवस्य रथं प्रति
MBh 7.93.20
अनासाद्य तु शैनेयं सा शक्तिः कालसंनिभा भित्त्वा रथं जगामोग्रा धरणीं दारुणस्वना
MBh 7.93.21
ततो द्रोणं शिनेः पौत्रो राजन्विव्याध पत्रिणा दक्षिणं भुजमासाद्य पीडयन्भरतर्षभ
MBh 7.93.22
द्रोणोऽपि समरे राजन्माधवस्य महद्धनुः अर्धचन्द्रेण चिच्छेद रथशक्त्या च सारथिम्
MBh 7.93.23
मुमोह सारथिस्तस्य रथशक्त्या समाहतः स रथोपस्थमासाद्य मुहूर्तं संन्यषीदत
MBh 7.93.24
चकार सात्यकी राजंस्तत्र कर्मातिमानुषम् अयोधयच्च यद्द्रोणं रश्मीञ्जग्राह च स्वयम्
MBh 7.93.25
ततः शरशतेनैव युयुधानो महारथः अविध्यद्ब्राह्मणं संख्ये हृष्टरूपो विशां पते
MBh 7.93.26
तस्य द्रोणः शरान्पञ्च प्रेषयामास भारत ते तस्य कवचं भित्त्वा पपुः शोणितमाहवे
MBh 7.93.27
निर्विद्धस्तु शरैर्घोरैरक्रुध्यत्सात्यकिर्भृशम् सायकान्व्यसृजच्चापि वीरो रुक्मरथं प्रति
MBh 7.93.28
ततो द्रोणस्य यन्तारं निपात्यैकेषुणा भुवि अश्वान्व्यद्रावयद्बाणैर्हतसूतान्महात्मनः
MBh 7.93.29
स रथः प्रद्रुतः संख्ये मण्डलानि सहस्रशः चकार राजतो राजन्भ्राजमान इवांशुमान्
MBh 7.93.30
अभिद्रवत गृह्णीत हयान्द्रोणस्य धावत इति स्म चुक्रुशुः सर्वे राजपुत्राः सराजकाः
MBh 7.93.31
ते सात्यकिमपास्याशु राजन्युधि महारथाः यतो द्रोणस्ततः सर्वे सहसा समुपाद्रवन्
MBh 7.93.32
तान्दृष्ट्वा प्रद्रुतान्सर्वान्सात्वतेन शरार्दितान् प्रभग्नं पुनरेवासीत्तव सैन्यं समाकुलम्
MBh 7.93.33
व्यूहस्यैव पुनर्द्वारं गत्वा द्रोणो व्यवस्थितः वातायमानैस्तैरश्वैर्हृतो वृष्णिशरार्दितैः
MBh 7.93.34
पाण्डुपाञ्चालसंभग्नं व्यूहमालोक्य वीर्यवान् शैनेये नाकरोद्यत्नं व्यूहस्यैवाभिरक्षणे
MBh 7.93.35
निवार्य पाण्डुपाञ्चालान्द्रोणाग्निः प्रदहन्निव तस्थौ क्रोधाग्निसंदीप्तः कालसूर्य इवोदितः

🪷 The Honest Framing

This chapter belongs to the source-pinned BORI Critical Edition-derived digital witness. Its unique addresses are publicly readable and indexable; this remains a digital-witness claim, not a claim that every Mahābhārata recension agrees word-for-word or that the traditional 100,000-verse extent is represented here.

Navigation

Sources and Connected Readings

Continue from these 35 source-pinned Devanāgarī addresses to Droṇa-Parva, the Mahābhārata reading map, and any exact Bhagavad-Gītā correspondence.

MBh 7.93local chapter route · Droṇa-ParvaDroṇa-Parvaparent Parva chapter index/mahabharata18-parva Sanskrit reading index with edition and address notesBhīṣma-ParvaMahābhārata Parva 6 · the Gītā lives in chapters 23-40MBh 6.23Bhagavad-Gītā chapter 1 in its Itihāsa homeMBh 6.40Bhagavad-Gītā chapter 18 in its Itihāsa homeRāmopākhyānaVana-Parva 258 · Vyāsa narrates the Rāma-kathā inside Krishna's epicNārāyaṇīyamŚānti-Parva 335 · Nārāyaṇa/Krishna/Viṣṇu/Vāsudeva unity witness/bhagavad-gitadeep Gītā corpus with translations, commentaries, and verse-level anchorsBG 1.1Dharma-kṣetra opening cross-anchored to MBh 6.23.1BG 18.66Carama-Śloka surrender seal inside the Bhīṣma-Parva arcVyāsa vibhūtiBG 10.37 · Krishna names Vyāsa among munisBG 10.37Vyāsa and Dhanañjaya as Krishna-vibhūti source routeŚB 1.2.11Brahman · Paramātmā · Bhagavān as one advaya-tattvaŚB 1.3.28kṛṣṇas tu bhagavān svayam · Vyāsa corpus source seal/binduDiamond of Darśanas · Itihāsa as one Bindu aperture/philosophyKrishna = Paramaatma = Parabrahman constitutional foundation

🪷 जय व्यास भगवान् 🪷