🪷 Mahābhārata · Śānti-Parva · Chapter 37

The Book of Peace · the great dharma-śāstra · Parva 12 · 43 unique Sanskrit addresses · pinned Critical Edition-derived witness

The Devanāgarī Yathārtha · 43 Shlokas

MBh 12.37.1
वैशंपायन उवाच एवमुक्तो भगवता धर्मराजो युधिष्ठिरः चिन्तयित्वा मुहूर्तं तु प्रत्युवाच तपोधनम्
MBh 12.37.2
किं भक्ष्यं किमभक्ष्यं च किं च देयं प्रशस्यते किं च पात्रमपात्रं वा तन्मे ब्रूहि पितामह
MBh 12.37.3
व्यास उवाच अत्राप्युदाहरन्तीममितिहासं पुरातनम् सिद्धानां चैव संवादं मनोश्चैव प्रजापतेः
MBh 12.37.4
सिद्धास्तपोव्रतपराः समागम्य पुरा विभुम् धर्मं पप्रच्छुरासीनमादिकाले प्रजापतिम्
MBh 12.37.5
कथमन्नं कथं दानं कथमध्ययनं तपः कार्याकार्यं च नः सर्वं शंस वै त्वं प्रजापते
MBh 12.37.6
तैरेवमुक्तो भगवान्मनुः स्वायंभुवोऽब्रवीत् शुश्रूषध्वं यथावृत्तं धर्मं व्याससमासतः
MBh 12.37.7
अदत्तस्यानुपादानं दानमध्ययनं तपः अहिंसा सत्यमक्रोधः क्षमेज्या धर्मलक्षणम्
MBh 12.37.8
य एव धर्मः सोऽधर्मोऽदेशेऽकाले प्रतिष्ठितः आदानमनृतं हिंसा धर्मो व्यावस्थिकः स्मृतः
MBh 12.37.9
द्विविधौ चाप्युभावेतौ धर्माधर्मौ विजानताम् अप्रवृत्तिः प्रवृत्तिश्च द्वैविध्यं लोकवेदयोः
MBh 12.37.10
अप्रवृत्तेरमर्त्यत्वं मर्त्यत्वं कर्मणः फलम् अशुभस्याशुभं विद्याच्छुभस्य शुभमेव च
MBh 12.37.11
एतयोश्चोभयोः स्यातां शुभाशुभतया तथा दैवं च दैवयुक्तं च प्राणश्च प्रलयश्च ह
MBh 12.37.12
अप्रेक्षापूर्वकरणादशुभानां शुभं फलम् ऊर्ध्वं भवति संदेहादिह दृष्टार्थमेव वा अप्रेक्षापूर्वकरणात्प्रायश्चित्तं विधीयते
MBh 12.37.13
क्रोधमोहकृते चैव दृष्टान्तागमहेतुभिः शरीराणामुपक्लेशो मनसश्च प्रियाप्रिये तदौषधैश्च मन्त्रैश्च प्रायश्चित्तैश्च शाम्यति
MBh 12.37.14
जातिश्रेण्यधिवासानां कुलधर्मांश्च सर्वतः वर्जयेन्न हि तं धर्मं येषां धर्मो न विद्यते
MBh 12.37.15
दश वा वेदशास्त्रज्ञास्त्रयो वा धर्मपाठकाः यद्ब्रूयुः कार्य उत्पन्ने स धर्मो धर्मसंशये
MBh 12.37.16
अरुणा मृत्तिका चैव तथा चैव पिपीलकाः श्लेष्मातकस्तथा विप्रैरभक्ष्यं विषमेव च
MBh 12.37.17
अभक्ष्या ब्राह्मणैर्मत्स्याः शकलैर्ये विवर्जिताः चतुष्पात्कच्छपादन्यो मण्डूका जलजाश्च ये
MBh 12.37.18
भासा हंसाः सुपर्णाश्च चक्रवाका बकाः प्लवाः कङ्को मद्गुश्च गृध्राश्च काकोलूकं तथैव च
MBh 12.37.19
क्रव्यादाः पक्षिणः सर्वे चतुष्पादाश्च दंष्ट्रिणः येषां चोभयतो दन्ताश्चतुर्दंष्ट्राश्च सर्वशः
MBh 12.37.20
एडकाश्वखरोष्ट्रीणां सूतिकानां गवामपि मानुषीणां मृगीणां च न पिबेद्ब्राह्मणः पयः
MBh 12.37.21
प्रेतान्नं सूतिकान्नं च यच्च किंचिदनिर्दशम् अभोज्यं चाप्यपेयं च धेन्वा दुग्धमनिर्दशम्
MBh 12.37.22
तक्ष्णश्चर्मावकर्तुश्च पुंश्चल्या रजकस्य च चिकित्सकस्य यच्चान्नमभोज्यं रक्षिणस्तथा
MBh 12.37.23
गणग्रामाभिशस्तानां रङ्गस्त्रीजीविनश्च ये परिवित्तिनपुंषां च बन्दिद्यूतविदां तथा
MBh 12.37.24
वार्यमाणाहृतं चान्नं शुक्तं पर्युषितं च यत् सुरानुगतमुच्छिष्टमभोज्यं शेषितं च यत्
MBh 12.37.25
पिष्टमांसेक्षुशाकानां विकाराः पयसस्तथा सक्तुधानाकरम्भाश्च नोपभोज्याश्चिरस्थिताः
MBh 12.37.26
पायसं कृसरं मांसमपूपाश्च वृथा कृताः अभोज्याश्चाप्यभक्ष्याश्च ब्राह्मणैर्गृहमेधिभिः
MBh 12.37.27
देवान्पितॄन्मनुष्यांश्च मुनीन्गृह्याश्च देवताः पूजयित्वा ततः पश्चाद्गृहस्थो भोक्तुमर्हति
MBh 12.37.28
यथा प्रव्रजितो भिक्षुर्गृहस्थः स्वगृहे वसेत् एवंवृत्तः प्रियैर्दारैः संवसन्धर्ममाप्नुयात्
MBh 12.37.29
न दद्याद्यशसे दानं न भयान्नोपकारिणे न नृत्तगीतशीलेषु हासकेषु च धार्मिकः
MBh 12.37.30
न मत्ते नैव चोन्मत्ते न स्तेने न चिकित्सके न वाग्घीने विवर्णे वा नाङ्गहीने न वामने
MBh 12.37.31
न दुर्जने दौष्कुले वा व्रतैर्वा यो न संस्कृतः अश्रोत्रिये मृतं दानं ब्राह्मणेऽब्रह्मवादिनि
MBh 12.37.32
असम्यक्चैव यद्दत्तमसम्यक्च प्रतिग्रहः उभयोः स्यादनर्थाय दातुरादातुरेव च
MBh 12.37.33
यथा खदिरमालम्ब्य शिलां वाप्यर्णवं तरन् मज्जते मज्जते तद्वद्दाता यश्च प्रतीच्छकः
MBh 12.37.34
काष्ठैरार्द्रैर्यथा वह्निरुपस्तीर्णो न दीप्यते तपःस्वाध्यायचारित्रैरेवं हीनः प्रतिग्रही
MBh 12.37.35
कपाले यद्वदापः स्युः श्वदृतौ वा यथा पयः आश्रयस्थानदोषेण वृत्तहीने तथा श्रुतम्
MBh 12.37.36
निर्मन्त्रो निर्व्रतो यः स्यादशास्त्रज्ञोऽनसूयकः अनुक्रोशात्प्रदातव्यं दीनेष्वेवं नरेष्वपि
MBh 12.37.37
न वै देयमनुक्रोशाद्दीनायाप्यपकारिणे आप्ताचरितमित्येव धर्म इत्येव वा पुनः
MBh 12.37.38
निष्कारणं स्म तद्दत्तं ब्राह्मणे धर्मवर्जिते भवेदपात्रदोषेण न मेऽत्रास्ति विचारणा
MBh 12.37.39
यथा दारुमयो हस्ती यथा चर्ममयो मृगः ब्राह्मणश्चानधीयानस्त्रयस्ते नामधारकाः
MBh 12.37.40
यथा षण्ढोऽफलः स्त्रीषु यथा गौर्गवि चाफला शकुनिर्वाप्यपक्षः स्यान्निर्मन्त्रो ब्राह्मणस्तथा
MBh 12.37.41
ग्रामधान्यं यथा शून्यं यथा कूपश्च निर्जलः यथा हुतमनग्नौ च तथैव स्यान्निराकृतौ
MBh 12.37.42
देवतानां पितॄणां च हव्यकव्यविनाशनः शत्रुरर्थहरो मूर्खो न लोकान्प्राप्तुमर्हति
MBh 12.37.43
एतत्ते कथितं सर्वं यथा वृत्तं युधिष्ठिर समासेन महद्ध्येतच्छ्रोतव्यं भरतर्षभ

🪷 The Honest Framing

This chapter belongs to the source-pinned BORI Critical Edition-derived digital witness. Its unique addresses are publicly readable and indexable; this remains a digital-witness claim, not a claim that every Mahābhārata recension agrees word-for-word or that the traditional 100,000-verse extent is represented here.

Navigation

Sources and Connected Readings

Continue from these 43 source-pinned Devanāgarī addresses to Śānti-Parva, the Mahābhārata reading map, and any exact Bhagavad-Gītā correspondence.

MBh 12.37local chapter route · Śānti-ParvaŚānti-Parvaparent Parva chapter index/mahabharata18-parva Sanskrit reading index with edition and address notesBhīṣma-ParvaMahābhārata Parva 6 · the Gītā lives in chapters 23-40MBh 6.23Bhagavad-Gītā chapter 1 in its Itihāsa homeMBh 6.40Bhagavad-Gītā chapter 18 in its Itihāsa homeRāmopākhyānaVana-Parva 258 · Vyāsa narrates the Rāma-kathā inside Krishna's epicNārāyaṇīyamŚānti-Parva 335 · Nārāyaṇa/Krishna/Viṣṇu/Vāsudeva unity witness/bhagavad-gitadeep Gītā corpus with translations, commentaries, and verse-level anchorsBG 1.1Dharma-kṣetra opening cross-anchored to MBh 6.23.1BG 18.66Carama-Śloka surrender seal inside the Bhīṣma-Parva arcVyāsa vibhūtiBG 10.37 · Krishna names Vyāsa among munisBG 10.37Vyāsa and Dhanañjaya as Krishna-vibhūti source routeŚB 1.2.11Brahman · Paramātmā · Bhagavān as one advaya-tattvaŚB 1.3.28kṛṣṇas tu bhagavān svayam · Vyāsa corpus source seal/binduDiamond of Darśanas · Itihāsa as one Bindu aperture/philosophyKrishna = Paramaatma = Parabrahman constitutional foundation

🪷 जय व्यास भगवान् 🪷