🪷 Mahābhārata · Śānti-Parva · Chapter 287

The Book of Peace · the great dharma-śāstra · Parva 12 · 45 unique Sanskrit addresses · pinned Critical Edition-derived witness

The Devanāgarī Yathārtha · 45 Shlokas

MBh 12.287.1
भीष्म उवाच पुनरेव तु पप्रच्छ जनको मिथिलाधिपः पराशरं महात्मानं धर्मे परमनिश्चयम्
MBh 12.287.2
किं श्रेयः का गतिर्ब्रह्मन्किं कृतं न विनश्यति क्व गतो न निवर्तेत तन्मे ब्रूहि महामुने
MBh 12.287.3
पराशर उवाच असङ्गः श्रेयसो मूलं ज्ञानं ज्ञानगतिः परा चीर्णं तपो न प्रणश्येद्वापः क्षेत्रे न नश्यति
MBh 12.287.4
छित्त्वाधर्ममयं पाशं यदा धर्मेऽभिरज्यते दत्त्वाभयकृतं दानं तदा सिद्धिमवाप्नुयात्
MBh 12.287.5
यो ददाति सहस्राणि गवामश्वशतानि च अभयं सर्वभूतेभ्यस्तद्दानमतिवर्तते
MBh 12.287.6
वसन्विषयमध्येऽपि न वसत्येव बुद्धिमान् संवसत्येव दुर्बुद्धिरसत्सु विषयेष्वपि
MBh 12.287.7
नाधर्मः श्लिष्यते प्राज्ञमापः पुष्करपर्णवत् अप्राज्ञमधिकं पापं श्लिष्यते जतु काष्ठवत्
MBh 12.287.8
नाधर्मः कारणापेक्षी कर्तारमभिमुञ्चति कर्ता खलु यथाकालं तत्सर्वमभिपद्यते न भिद्यन्ते कृतात्मान आत्मप्रत्ययदर्शिनः
MBh 12.287.9
बुद्धिकर्मेन्द्रियाणां हि प्रमत्तो यो न बुध्यते शुभाशुभेषु सक्तात्मा प्राप्नोति सुमहद्भयम्
MBh 12.287.10
वीतरागो जितक्रोधः सम्यग्भवति यः सदा विषये वर्तमानोऽपि न स पापेन युज्यते
MBh 12.287.11
मर्यादायां धर्मसेतुर्निबद्धो नैव सीदति पुष्टस्रोत इवायत्तः स्फीतो भवति संचयः
MBh 12.287.12
यथा भानुगतं तेजो मणिः शुद्धः समाधिना आदत्ते राजशार्दूल तथा योगः प्रवर्तते
MBh 12.287.13
यथा तिलानामिह पुष्पसंश्रया;त्पृथक्पृथग्याति गुणोऽतिसौम्यताम् तथा नराणां भुवि भावितात्मनां; यथाश्रयं सत्त्वगुणः प्रवर्तते
MBh 12.287.14
जहाति दारानिहते न संपदः; सदश्वयानं विविधाश्च याः क्रियाः त्रिविष्टपे जातमतिर्यदा नर;स्तदास्य बुद्धिर्विषयेषु भिद्यते
MBh 12.287.15
प्रसक्तबुद्धिर्विषयेषु यो नरो; यो बुध्यते ह्यात्महितं कदा च न स सर्वभावानुगतेन चेतसा; नृपामिषेणेव झषो विकृष्यते
MBh 12.287.16
संघातवान्मर्त्यलोकः परस्परमपाश्रितः कदलीगर्भनिःसारो नौरिवाप्सु निमज्जति
MBh 12.287.17
न धर्मकालः पुरुषस्य निश्चितो; न चापि मृत्युः पुरुषं प्रतीक्षते क्रिया हि धर्मस्य सदैव शोभना; यदा नरो मृत्युमुखेऽभिवर्तते
MBh 12.287.18
यथान्धः स्वगृहे युक्तो ह्यभ्यासादेव गच्छति तथा युक्तेन मनसा प्राज्ञो गच्छति तां गतिम्
MBh 12.287.19
मरणं जन्मनि प्रोक्तं जन्म वै मरणाश्रितम् अविद्वान्मोक्षधर्मेषु बद्धो भ्रमति चक्रवत्
MBh 12.287.20
यथा मृणालोऽनुगतमाशु मुञ्चति कर्दमम् तथात्मा पुरुषस्येह मनसा परिमुच्यते मनः प्रणयतेऽऽत्मानं स एनमभियुञ्जति
MBh 12.287.21
परार्थे वर्तमानस्तु स्वकार्यं योऽभिमन्यते इन्द्रियार्थेषु सक्तः सन्स्वकार्यात्परिहीयते
MBh 12.287.22
अधस्तिर्यग्गतिं चैव स्वर्गे चैव परां गतिम् प्राप्नोति स्वकृतैरात्मा प्राज्ञस्येहेतरस्य च
MBh 12.287.23
मृन्मये भाजने पक्वे यथा वै न्यस्यते द्रवः तथा शरीरं तपसा तप्तं विषयमश्नुते
MBh 12.287.24
विषयानश्नुते यस्तु न स भोक्ष्यत्यसंशयम् यस्तु भोगांस्त्यजेदात्मा स वै भोक्तुं व्यवस्यति
MBh 12.287.25
नीहारेण हि संवीतः शिश्नोदरपरायणः जात्यन्ध इव पन्थानमावृतात्मा न बुध्यते
MBh 12.287.26
वणिग्यथा समुद्राद्वै यथार्थं लभते धनम् तथा मर्त्यार्णवे जन्तोः कर्मविज्ञानतो गतिः
MBh 12.287.27
अहोरात्रमये लोके जरारूपेण संचरन् मृत्युर्ग्रसति भूतानि पवनं पन्नगो यथा
MBh 12.287.28
स्वयं कृतानि कर्माणि जातो जन्तुः प्रपद्यते नाकृतं लभते कश्चित्किंचिदत्र प्रियाप्रियम्
MBh 12.287.29
शयानं यान्तमासीनं प्रवृत्तं विषयेषु च शुभाशुभानि कर्माणि प्रपद्यन्ते नरं सदा
MBh 12.287.30
न ह्यन्यत्तीरमासाद्य पुनस्तर्तुं व्यवस्यति दुर्लभो दृश्यते ह्यस्य विनिपातो महार्णवे
MBh 12.287.31
यथा भारावसक्ता हि नौर्महाम्भसि तन्तुना तथा मनोऽभियोगाद्वै शरीरं प्रतिकर्षति
MBh 12.287.32
यथा समुद्रमभितः संस्यूताः सरितोऽपराः तथाद्या प्रकृतिर्योगादभिसंस्यूयते सदा
MBh 12.287.33
स्नेहपाशैर्बहुविधैरासक्तमनसो नराः प्रकृतिस्था विषीदन्ति जले सैकतवेश्मवत्
MBh 12.287.34
शरीरगृहसंस्थस्य शौचतीर्थस्य देहिनः बुद्धिमार्गप्रयातस्य सुखं त्विह परत्र च
MBh 12.287.35
विस्तराः क्लेशसंयुक्ताः संक्षेपास्तु सुखावहाः परार्थं विस्तराः सर्वे त्यागमात्महितं विदुः
MBh 12.287.36
संकल्पजो मित्रवर्गो ज्ञातयः कारणात्मकाः भार्या दासाश्च पुत्राश्च स्वमर्थमनुयुञ्जते
MBh 12.287.37
न माता न पिता किंचित्कस्यचित्प्रतिपद्यते दानपथ्योदनो जन्तुः स्वकर्मफलमश्नुते
MBh 12.287.38
माता पुत्रः पिता भ्राता भार्या मित्रजनस्तथा अष्टापदपदस्थाने त्वक्षमुद्रेव न्यस्यते
MBh 12.287.39
सर्वाणि कर्माणि पुरा कृतानि; शुभाशुभान्यात्मनो यान्ति जन्तोः उपस्थितं कर्मफलं विदित्वा; बुद्धिं तथा चोदयतेऽन्तरात्मा
MBh 12.287.40
व्यवसायं समाश्रित्य सहायान्योऽधिगच्छति न तस्य कश्चिदारम्भः कदाचिदवसीदति
MBh 12.287.41
अद्वैधमनसं युक्तं शूरं धीरं विपश्चितम् न श्रीः संत्यजते नित्यमादित्यमिव रश्मयः
MBh 12.287.42
आस्तिक्यव्यवसायाभ्यामुपायाद्विस्मयाद्धिया यमारभत्यनिन्द्यात्मा न सोऽर्थः परिसीदति
MBh 12.287.43
सर्वः स्वानि शुभाशुभानि नियतं कर्माणि जन्तुः स्वयं; गर्भात्संप्रतिपद्यते तदुभयं यत्तेन पूर्वं कृतम् मृत्युश्चापरिहारवान्समगतिः कालेन विच्छेदिता; दारोश्चूर्णमिवाश्मसारविहितं कर्मान्तिकं प्रापयेत्
MBh 12.287.44
स्वरूपतामात्मकृतं च विस्तरं; कुलान्वयं द्रव्यसमृद्धिसंचयम् नरो हि सर्वो लभते यथाकृतं; शुभाशुभेनात्मकृतेन कर्मणा
MBh 12.287.45
भीष्म उवाच इत्युक्तो जनको राजन्यथातथ्यं मनीषिणा श्रुत्वा धर्मविदां श्रेष्ठः परां मुदमवाप ह

🪷 The Honest Framing

This chapter belongs to the source-pinned BORI Critical Edition-derived digital witness. Its unique addresses are publicly readable and indexable; this remains a digital-witness claim, not a claim that every Mahābhārata recension agrees word-for-word or that the traditional 100,000-verse extent is represented here.

Navigation

Sources and Connected Readings

Continue from these 45 source-pinned Devanāgarī addresses to Śānti-Parva, the Mahābhārata reading map, and any exact Bhagavad-Gītā correspondence.

MBh 12.287local chapter route · Śānti-ParvaŚānti-Parvaparent Parva chapter index/mahabharata18-parva Sanskrit reading index with edition and address notesBhīṣma-ParvaMahābhārata Parva 6 · the Gītā lives in chapters 23-40MBh 6.23Bhagavad-Gītā chapter 1 in its Itihāsa homeMBh 6.40Bhagavad-Gītā chapter 18 in its Itihāsa homeRāmopākhyānaVana-Parva 258 · Vyāsa narrates the Rāma-kathā inside Krishna's epicNārāyaṇīyamŚānti-Parva 335 · Nārāyaṇa/Krishna/Viṣṇu/Vāsudeva unity witness/bhagavad-gitadeep Gītā corpus with translations, commentaries, and verse-level anchorsBG 1.1Dharma-kṣetra opening cross-anchored to MBh 6.23.1BG 18.66Carama-Śloka surrender seal inside the Bhīṣma-Parva arcVyāsa vibhūtiBG 10.37 · Krishna names Vyāsa among munisBG 10.37Vyāsa and Dhanañjaya as Krishna-vibhūti source routeŚB 1.2.11Brahman · Paramātmā · Bhagavān as one advaya-tattvaŚB 1.3.28kṛṣṇas tu bhagavān svayam · Vyāsa corpus source seal/binduDiamond of Darśanas · Itihāsa as one Bindu aperture/philosophyKrishna = Paramaatma = Parabrahman constitutional foundation

🪷 जय व्यास भगवान् 🪷