🪷 Mahābhārata · Virāṭa-Parva · Chapter 38

The Book of Virāṭa · Parva 4 · 58 unique Sanskrit addresses · pinned Critical Edition-derived witness

The Devanāgarī Yathārtha · 58 Shlokas

MBh 4.38.1
वैशंपायन उवाच तां शमीमुपसंगम्य पार्थो वैराटिमब्रवीत् सुकुमारं समाज्ञातं संग्रामे नातिकोविदम्
MBh 4.38.2
समादिष्टो मया क्षिप्रं धनूंष्यवहरोत्तर नेमानि हि त्वदीयानि सोढुं शक्ष्यन्ति मे बलम्
MBh 4.38.3
भारं वापि गुरुं हर्तुं कुञ्जरं वा प्रमर्दितुम् मम वा बाहुविक्षेपं शत्रूनिह विजेष्यतः
MBh 4.38.4
तस्माद्भूमिंजयारोह शमीमेतां पलाशिनीम् अस्यां हि पाण्डुपुत्राणां धनूंषि निहितान्युत
MBh 4.38.5
युधिष्ठिरस्य भीमस्य बीभत्सोर्यमयोस्तथा ध्वजाः शराश्च शूराणां दिव्यानि कवचानि च
MBh 4.38.6
अत्र चैतन्महावीर्यं धनुः पार्थस्य गाण्डिवम् एकं शतसहस्रेण संमितं राष्ट्रवर्धनम्
MBh 4.38.7
व्यायामसहमत्यर्थं तृणराजसमं महत् सर्वायुधमहामात्रं शत्रुसंबाधकारकम्
MBh 4.38.8
सुवर्णविकृतं दिव्यं श्लक्ष्णमायतमव्रणम् अलं भारं गुरुं वोढुं दारुणं चारुदर्शनम् तादृशान्येव सर्वाणि बलवन्ति दृढानि च
MBh 4.38.9
उत्तर उवाच अस्मिन्वृक्षे किलोद्बद्धं शरीरमिति नः श्रुतम् तदहं राजपुत्रः सन्स्पृशेयं पाणिना कथम्
MBh 4.38.10
नैवंविधं मया युक्तमालब्धुं क्षत्रयोनिना महता राजपुत्रेण मन्त्रयज्ञविदा सता
MBh 4.38.11
स्पृष्टवन्तं शरीरं मां शववाहमिवाशुचिम् कथं वा व्यवहार्यं वै कुर्वीथास्त्वं बृहन्नडे
MBh 4.38.12
बृहन्नडोवाच व्यवहार्यश्च राजेन्द्र शुचिश्चैव भविष्यसि धनूंष्येतानि मा भैस्त्वं शरीरं नात्र विद्यते
MBh 4.38.13
दायादं मत्स्यराजस्य कुले जातं मनस्विनम् कथं त्वा निन्दितं कर्म कारयेयं नृपात्मज
MBh 4.38.14
वैशंपायन उवाच एवमुक्तः स पार्थेन रथात्प्रस्कन्द्य कुण्डली आरुरोह शमीवृक्षं वैराटिरवशस्तदा
MBh 4.38.15
तमन्वशासच्छत्रुघ्नो रथे तिष्ठन्धनंजयः परिवेष्टनमेतेषां क्षिप्रं चैव व्यपानुद
MBh 4.38.16
तथा संनहनान्येषां परिमुच्य समन्ततः अपश्यद्गाण्डिवं तत्र चतुर्भिरपरैः सह
MBh 4.38.17
तेषां विमुच्यमानानां धनुषामर्कवर्चसाम् विनिश्चेरुः प्रभा दिव्या ग्रहाणामुदयेष्विव
MBh 4.38.18
स तेषां रूपमालोक्य भोगिनामिव जृम्भताम् हृष्टरोमा भयोद्विग्नः क्षणेन समपद्यत
MBh 4.38.19
संस्पृश्य तानि चापानि भानुमन्ति बृहन्ति च वैराटिरर्जुनं राजन्निदं वचनमब्रवीत्
MBh 4.38.20
उत्तर उवाच बिन्दवो जातरूपस्य शतं यस्मिन्निपातिताः सहस्रकोटि सौवर्णाः कस्यैतद्धनुरुत्तमम्
MBh 4.38.21
वारणा यस्य सौवर्णाः पृष्ठे भासन्ति दंशिताः सुपार्श्वं सुग्रहं चैव कस्यैतद्धनुरुत्तमम्
MBh 4.38.22
तपनीयस्य शुद्धस्य षष्टिर्यस्येन्द्रगोपकाः पृष्ठे विभक्ताः शोभन्ते कस्यैतद्धनुरुत्तमम्
MBh 4.38.23
सूर्या यत्र च सौवर्णास्त्रयो भासन्ति दंशिताः तेजसा प्रज्वलन्तो हि कस्यैतद्धनुरुत्तमम्
MBh 4.38.24
शालभा यत्र सौवर्णास्तपनीयविचित्रिताः सुवर्णमणिचित्रं च कस्यैतद्धनुरुत्तमम्
MBh 4.38.25
इमे च कस्य नाराचाः सहस्रा लोमवाहिनः समन्तात्कलधौताग्रा उपासङ्गे हिरण्मये
MBh 4.38.26
विपाठाः पृथवः कस्य गार्ध्रपत्राः शिलाशिताः हारिद्रवर्णाः सुनसाः पीताः सर्वायसाः शराः
MBh 4.38.27
कस्यायमसितावापः पञ्चशार्दूललक्षणः वराहकर्णव्यामिश्रः शरान्धारयते दश
MBh 4.38.28
कस्येमे पृथवो दीर्घाः सर्वपारशवाः शराः शतानि सप्त तिष्ठन्ति नाराचा रुधिराशनाः
MBh 4.38.29
कस्येमे शुकपत्राभैः पूर्वैरर्धैः सुवाससः उत्तरैरायसैः पीतैर्हेमपुङ्खैः शिलाशितैः
MBh 4.38.30
कस्यायं सायको दीर्घः शिलीपृष्ठः शिलीमुखः वैयाघ्रकोशे निहितो हेमचित्रत्सरुर्महान्
MBh 4.38.31
सुफलश्चित्रकोशश्च किङ्किणीसायको महान् कस्य हेमत्सरुर्दिव्यः खड्गः परमनिर्व्रणः
MBh 4.38.32
कस्यायं विमलः खड्गो गव्ये कोशे समर्पितः हेमत्सरुरनाधृष्यो नैषध्यो भारसाधनः
MBh 4.38.33
कस्य पाञ्चनखे कोशे सायको हेमविग्रहः प्रमाणरूपसंपन्नः पीत आकाशसंनिभः
MBh 4.38.34
कस्य हेममये कोशे सुतप्ते पावकप्रभे निस्त्रिंशोऽयं गुरुः पीतः सैक्यः परमनिर्व्रणः
MBh 4.38.35
निर्दिशस्व यथातत्त्वं मया पृष्टा बृहन्नडे विस्मयो मे परो जातो दृष्ट्वा सर्वमिदं महत्
MBh 4.38.36
बृहन्नडोवाच यन्मां पूर्वमिहापृच्छः शत्रुसेनानिबर्हणम् गाण्डीवमेतत्पार्थस्य लोकेषु विदितं धनुः
MBh 4.38.37
सर्वायुधमहामात्रं शातकुम्भपरिष्कृतम् एतत्तदर्जुनस्यासीद्गाण्डीवं परमायुधम्
MBh 4.38.38
यत्तच्छतसहस्रेण संमितं राष्ट्रवर्धनम् येन देवान्मनुष्यांश्च पार्थो विषहते मृधे
MBh 4.38.39
देवदानवगन्धर्वैः पूजितं शाश्वतीः समाः एतद्वर्षसहस्रं तु ब्रह्मा पूर्वमधारयत्
MBh 4.38.40
ततोऽनन्तरमेवाथ प्रजापतिरधारयत् त्रीणि पञ्चशतं चैव शक्रोऽशीति च पञ्च च
MBh 4.38.41
सोमः पञ्चशतं राजा तथैव वरुणः शतम् पार्थः पञ्च च षष्टिं च वर्षाणि श्वेतवाहनः
MBh 4.38.42
महावीर्यं महद्दिव्यमेतत्तद्धनुरुत्तमम् पूजितं सुरमर्त्येषु बिभर्ति परमं वपुः
MBh 4.38.43
सुपार्श्वं भीमसेनस्य जातरूपग्रहं धनुः येन पार्थोऽजयत्कृत्स्नां दिशं प्राचीं परंतपः
MBh 4.38.44
इन्द्रगोपकचित्रं च यदेतच्चारुविग्रहम् राज्ञो युधिष्ठिरस्यैतद्वैराटे धनुरुत्तमम्
MBh 4.38.45
सूर्या यस्मिंस्तु सौवर्णाः प्रभासन्ते प्रभासिनः तेजसा प्रज्वलन्तो वै नकुलस्यैतदायुधम्
MBh 4.38.46
शलभा यत्र सौवर्णास्तपनीयविचित्रिताः एतन्माद्रीसुतस्यापि सहदेवस्य कार्मुकम्
MBh 4.38.47
ये त्विमे क्षुरसंकाशाः सहस्रा लोमवाहिनः एतेऽर्जुनस्य वैराटे शराः सर्पविषोपमाः
MBh 4.38.48
एते ज्वलन्तः संग्रामे तेजसा शीघ्रगामिनः भवन्ति वीरस्याक्षय्या व्यूहतः समरे रिपून्
MBh 4.38.49
ये चेमे पृथवो दीर्घाश्चन्द्रबिम्बार्धदर्शनाः एते भीमस्य निशिता रिपुक्षयकराः शराः
MBh 4.38.50
हारिद्रवर्णा ये त्वेते हेमपुङ्खाः शिलाशिताः नकुलस्य कलापोऽयं पञ्चशार्दूललक्षणः
MBh 4.38.51
येनासौ व्यजयत्कृत्स्नां प्रतीचीं दिशमाहवे कलापो ह्येष तस्यासीन्माद्रीपुत्रस्य धीमतः
MBh 4.38.52
ये त्विमे भास्कराकाराः सर्वपारशवाः शराः एते चित्राः क्रियोपेताः सहदेवस्य धीमतः
MBh 4.38.53
ये त्विमे निशिताः पीताः पृथवो दीर्घवाससः हेमपुङ्खास्त्रिपर्वाणो राज्ञ एते महाशराः
MBh 4.38.54
यस्त्वयं सायको दीर्घः शिलीपृष्ठः शिलीमुखः अर्जुनस्यैष संग्रामे गुरुभारसहो दृढः
MBh 4.38.55
वैयाघ्रकोशस्तु महान्भीमसेनस्य सायकः गुरुभारसहो दिव्यः शात्रवाणां भयंकरः
MBh 4.38.56
सुफलश्चित्रकोशश्च हेमत्सरुरनुत्तमः निस्त्रिंशः कौरवस्यैष धर्मराजस्य धीमतः
MBh 4.38.57
यस्तु पाञ्चनखे कोशे निहितश्चित्रसेवने नकुलस्यैष निस्त्रिंशो गुरुभारसहो दृढः
MBh 4.38.58
यस्त्वयं विमलः खड्गो गव्ये कोशे समर्पितः सहदेवस्य विद्ध्येनं सर्वभारसहं दृढम्

🪷 The Honest Framing

This chapter belongs to the source-pinned BORI Critical Edition-derived digital witness. Its unique addresses are publicly readable and indexable; this remains a digital-witness claim, not a claim that every Mahābhārata recension agrees word-for-word or that the traditional 100,000-verse extent is represented here.

Navigation

Sources and Connected Readings

Continue from these 58 source-pinned Devanāgarī addresses to Virāṭa-Parva, the Mahābhārata reading map, and any exact Bhagavad-Gītā correspondence.

MBh 4.38local chapter route · Virāṭa-ParvaVirāṭa-Parvaparent Parva chapter index/mahabharata18-parva Sanskrit reading index with edition and address notesBhīṣma-ParvaMahābhārata Parva 6 · the Gītā lives in chapters 23-40MBh 6.23Bhagavad-Gītā chapter 1 in its Itihāsa homeMBh 6.40Bhagavad-Gītā chapter 18 in its Itihāsa homeRāmopākhyānaVana-Parva 258 · Vyāsa narrates the Rāma-kathā inside Krishna's epicNārāyaṇīyamŚānti-Parva 335 · Nārāyaṇa/Krishna/Viṣṇu/Vāsudeva unity witness/bhagavad-gitadeep Gītā corpus with translations, commentaries, and verse-level anchorsBG 1.1Dharma-kṣetra opening cross-anchored to MBh 6.23.1BG 18.66Carama-Śloka surrender seal inside the Bhīṣma-Parva arcVyāsa vibhūtiBG 10.37 · Krishna names Vyāsa among munisBG 10.37Vyāsa and Dhanañjaya as Krishna-vibhūti source routeŚB 1.2.11Brahman · Paramātmā · Bhagavān as one advaya-tattvaŚB 1.3.28kṛṣṇas tu bhagavān svayam · Vyāsa corpus source seal/binduDiamond of Darśanas · Itihāsa as one Bindu aperture/philosophyKrishna = Paramaatma = Parabrahman constitutional foundation

🪷 जय व्यास भगवान् 🪷