🪷 Mahābhārata · Śānti-Parva · Chapter 69

The Book of Peace · the great dharma-śāstra · Parva 12 · 71 unique Sanskrit addresses · pinned Critical Edition-derived witness

The Devanāgarī Yathārtha · 71 Shlokas

MBh 12.69.1
युधिष्ठिर उवाच पार्थिवेन विशेषेण किं कार्यमवशिष्यते कथं रक्ष्यो जनपदः कथं रक्ष्याश्च शत्रवः
MBh 12.69.2
कथं चारं प्रयुञ्जीत वर्णान्विश्वासयेत्कथम् कथं भृत्यान्कथं दारान्कथं पुत्रांश्च भारत
MBh 12.69.3
भीष्म उवाच राजवृत्तं महाराज शृणुष्वावहितोऽखिलम् यत्कार्यं पार्थिवेनादौ पार्थिवप्रकृतेन वा
MBh 12.69.4
आत्मा जेयः सदा राज्ञा ततो जेयाश्च शत्रवः अजितात्मा नरपतिर्विजयेत कथं रिपून्
MBh 12.69.5
एतावानात्मविजयः पञ्चवर्गविनिग्रहः जितेन्द्रियो नरपतिर्बाधितुं शक्नुयादरीन्
MBh 12.69.6
न्यसेत गुल्मान्दुर्गेषु संधौ च कुरुनन्दन नगरोपवने चैव पुरोद्यानेषु चैव ह
MBh 12.69.7
संस्थानेषु च सर्वेषु पुरेषु नगरस्य च मध्ये च नरशार्दूल तथा राजनिवेशने
MBh 12.69.8
प्रणिधींश्च ततः कुर्याज्जडान्धबधिराकृतीन् पुंसः परीक्षितान्प्राज्ञान्क्षुत्पिपासातपक्षमान्
MBh 12.69.9
अमात्येषु च सर्वेषु मित्रेषु त्रिविधेषु च पुत्रेषु च महाराज प्रणिदध्यात्समाहितः
MBh 12.69.10
पुरे जनपदे चैव तथा सामन्तराजसु यथा न विद्युरन्योन्यं प्रणिधेयास्तथा हि ते
MBh 12.69.11
चारांश्च विद्यात्प्रहितान्परेण भरतर्षभ आपणेषु विहारेषु समवायेषु भिक्षुषु
MBh 12.69.12
आरामेषु तथोद्याने पण्डितानां समागमे वेशेषु चत्वरे चैव सभास्वावसथेषु च
MBh 12.69.13
एवं विहन्याच्चारेण परचारं विचक्षणः चारेण विहतं सर्वं हतं भवति पाण्डव
MBh 12.69.14
यदा तु हीनं नृपतिर्विद्यादात्मानमात्मना अमात्यैः सह संमन्त्र्य कुर्यात्संधिं बलीयसा
MBh 12.69.15
अज्ञायमानो हीनत्वे कुर्यात्संधिं परेण वै लिप्सुर्वा कंचिदेवार्थं त्वरमाणो विचक्षणः
MBh 12.69.16
गुणवन्तो महोत्साहा धर्मज्ञाः साधवश्च ये संदधीत नृपस्तैश्च राष्ट्रं धर्मेण पालयन्
MBh 12.69.17
उच्छिद्यमानमात्मानं ज्ञात्वा राजा महामतिः पूर्वापकारिणो हन्याल्लोकद्विष्टांश्च सर्वशः
MBh 12.69.18
यो नोपकर्तुं शक्नोति नापकर्तुं महीपतिः अशक्यरूपश्चोद्धर्तुमुपेक्ष्यस्तादृशो भवेत्
MBh 12.69.19
यात्रां यायादविज्ञातमनाक्रन्दमनन्तरम् व्यासक्तं च प्रमत्तं च दुर्बलं च विचक्षणः
MBh 12.69.20
यात्रामाज्ञापयेद्वीरः कल्यपुष्टबलः सुखी पूर्वं कृत्वा विधानं च यात्रायां नगरे तथा
MBh 12.69.21
न च वश्यो भवेदस्य नृपो यद्यपि वीर्यवान् हीनश्च बलवीर्याभ्यां कर्शयंस्तं परावसेत्
MBh 12.69.22
राष्ट्रं च पीडयेत्तस्य शस्त्राग्निविषमूर्छनैः अमात्यवल्लभानां च विवादांस्तस्य कारयेत् वर्जनीयं सदा युद्धं राज्यकामेन धीमता
MBh 12.69.23
उपायैस्त्रिभिरादानमर्थस्याह बृहस्पतिः सान्त्वेनानुप्रदानेन भेदेन च नराधिप यमर्थं शक्नुयात्प्राप्तुं तेन तुष्येद्धि पण्डितः
MBh 12.69.24
आददीत बलिं चैव प्रजाभ्यः कुरुनन्दन षड्भागममितप्रज्ञस्तासामेवाभिगुप्तये
MBh 12.69.25
दशधर्मगतेभ्यो यद्वसु बह्वल्पमेव च तन्नाददीत सहसा पौराणां रक्षणाय वै
MBh 12.69.26
यथा पुत्रास्तथा पौरा द्रष्टव्यास्ते न संशयः भक्तिश्चैषां प्रकर्तव्या व्यवहारे प्रदर्शिते
MBh 12.69.27
सुतं च स्थापयेद्राजा प्राज्ञं सर्वार्थदर्शिनम् व्यवहारेषु सततं तत्र राज्यं व्यवस्थितम्
MBh 12.69.28
आकरे लवणे शुल्के तरे नागवने तथा न्यसेदमात्यान्नृपतिः स्वाप्तान्वा पुरुषान्हितान्
MBh 12.69.29
सम्यग्दण्डधरो नित्यं राजा धर्ममवाप्नुयात् नृपस्य सततं दण्डः सम्यग्धर्मे प्रशस्यते
MBh 12.69.30
वेदवेदाङ्गवित्प्राज्ञः सुतपस्वी नृपो भवेत् दानशीलश्च सततं यज्ञशीलश्च भारत
MBh 12.69.31
एते गुणाः समस्ताः स्युर्नृपस्य सततं स्थिराः क्रियालोपे तु नृपतेः कुतः स्वर्गः कुतो यशः
MBh 12.69.32
यदा तु पीडितो राजा भवेद्राज्ञा बलीयसा त्रिधा त्वाक्रन्द्य मित्राणि विधानमुपकल्पयेत्
MBh 12.69.33
घोषान्न्यसेत मार्गेषु ग्रामानुत्थापयेदपि प्रवेशयेच्च तान्सर्वाञ्शाखानगरकेष्वपि
MBh 12.69.34
ये गुप्ताश्चैव दुर्गाश्च देशास्तेषु प्रवेशयेत् धनिनो बलमुख्यांश्च सान्त्वयित्वा पुनः पुनः
MBh 12.69.35
सस्याभिहारं कुर्याच्च स्वयमेव नराधिपः असंभवे प्रवेशस्य दाहयेदग्निना भृशम्
MBh 12.69.36
क्षेत्रस्थेषु च सस्येषु शत्रोरुपजपेन्नरान् विनाशयेद्वा सर्वस्वं बलेनाथ स्वकेन वै
MBh 12.69.37
नदीषु मार्गेषु सदा संक्रमानवसादयेत् जलं निस्रावयेत्सर्वमनिस्राव्यं च दूषयेत्
MBh 12.69.38
तदात्वेनायतीभिश्च विवदन्भूम्यनन्तरम् प्रतीघातः परस्याजौ मित्रकालेऽप्युपस्थिते
MBh 12.69.39
दुर्गाणां चाभितो राजा मूलच्छेदं प्रकारयेत् सर्वेषां क्षुद्रवृक्षाणां चैत्यवृक्षान्विवर्जयेत्
MBh 12.69.40
प्रवृद्धानां च वृक्षाणां शाखाः प्रच्छेदयेत्तथा चैत्यानां सर्वथा वर्ज्यमपि पत्रस्य पातनम्
MBh 12.69.41
प्रकण्ठीः कारयेत्सम्यगाकाशजननीस्तथा आपूरयेच्च परिखाः स्थाणुनक्रझषाकुलाः
MBh 12.69.42
कडङ्गद्वारकाणि स्युरुच्छ्वासार्थे पुरस्य ह तेषां च द्वारवद्गुप्तिः कार्या सर्वात्मना भवेत्
MBh 12.69.43
द्वारेषु च गुरूण्येव यन्त्राणि स्थापयेत्सदा आरोपयेच्छतघ्नीश्च स्वाधीनानि च कारयेत्
MBh 12.69.44
काष्ठानि चाभिहार्याणि तथा कूपांश्च खानयेत् संशोधयेत्तथा कूपान्कृतान्पूर्वं पयोर्थिभिः
MBh 12.69.45
तृणच्छन्नानि वेश्मानि पङ्केनापि प्रलेपयेत् निर्हरेच्च तृणं मासे चैत्रे वह्निभयात्पुरः
MBh 12.69.46
नक्तमेव च भक्तानि पाचयेत नराधिपः न दिवाग्निर्ज्वलेद्गेहे वर्जयित्वाग्निहोत्रिकम्
MBh 12.69.47
कर्मारारिष्टशालासु ज्वलेदग्निः समाहितः गृहाणि च प्रविश्याथ विधेयः स्याद्धुताशनः
MBh 12.69.48
महादण्डश्च तस्य स्याद्यस्याग्निर्वै दिवा भवेत् प्रघोषयेदथैवं च रक्षणार्थं पुरस्य वै
MBh 12.69.49
भिक्षुकांश्चाक्रिकांश्चैव क्षीबोन्मत्तान्कुशीलवान् बाह्यान्कुर्यान्नरश्रेष्ठ दोषाय स्युर्हि तेऽन्यथा
MBh 12.69.50
चत्वरेषु च तीर्थेषु सभास्वावसथेषु च यथार्हवर्णं प्रणिधिं कुर्यात्सर्वत्र पार्थिवः
MBh 12.69.51
विशालान्राजमार्गांश्च कारयेत नराधिपः प्रपाश्च विपणीश्चैव यथोद्देशं समादिशेत्
MBh 12.69.52
भाण्डागारायुधागारान्धान्यागारांश्च सर्वशः अश्वागारान्गजागारान्बलाधिकरणानि च
MBh 12.69.53
परिखाश्चैव कौरव्य प्रतोलीः संकटानि च न जातु कश्चित्पश्येत्तु गुह्यमेतद्युधिष्ठिर
MBh 12.69.54
अथ संनिचयं कुर्याद्राजा परबलार्दितः तैलं मधु घृतं सस्यमौषधानि च सर्वशः
MBh 12.69.55
अङ्गारकुशमुञ्जानां पलाशशरपर्णिनाम् यवसेन्धनदिग्धानां कारयेत च संचयान्
MBh 12.69.56
आयुधानां च सर्वेषां शक्त्यृष्टिप्रासवर्मणाम् संचयानेवमादीनां कारयेत नराधिपः
MBh 12.69.57
औषधानि च सर्वाणि मूलानि च फलानि च चतुर्विधांश्च वैद्यान्वै संगृह्णीयाद्विशेषतः
MBh 12.69.58
नटाश्च नर्तकाश्चैव मल्ला मायाविनस्तथा शोभयेयुः पुरवरं मोदयेयुश्च सर्वशः
MBh 12.69.59
यतः शङ्का भवेच्चापि भृत्यतो वापि मन्त्रितः पौरेभ्यो नृपतेर्वापि स्वाधीनान्कारयेत तान्
MBh 12.69.60
कृते कर्मणि राजेन्द्र पूजयेद्धनसंचयैः मानेन च यथार्हेण सान्त्वेन विविधेन च
MBh 12.69.61
निर्वेदयित्वा तु परं हत्वा वा कुरुनन्दन गतानृण्यो भवेद्राजा यथा शास्त्रेषु दर्शितम्
MBh 12.69.62
राज्ञा सप्तैव रक्ष्याणि तानि चापि निबोध मे आत्मामात्यश्च कोशश्च दण्डो मित्राणि चैव हि
MBh 12.69.63
तथा जनपदश्चैव पुरं च कुरुनन्दन एतत्सप्तात्मकं राज्यं परिपाल्यं प्रयत्नतः
MBh 12.69.64
षाड्गुण्यं च त्रिवर्गं च त्रिवर्गमपरं तथा यो वेत्ति पुरुषव्याघ्र स भुनक्ति महीमिमाम्
MBh 12.69.65
षाड्गुण्यमिति यत्प्रोक्तं तन्निबोध युधिष्ठिर संधायासनमित्येव यात्रासंधानमेव च
MBh 12.69.66
विगृह्यासनमित्येव यात्रां संपरिगृह्य च द्वैधीभावस्तथान्येषां संश्रयोऽथ परस्य च
MBh 12.69.67
त्रिवर्गश्चापि यः प्रोक्तस्तमिहैकमनाः शृणु क्षयः स्थानं च वृद्धिश्च त्रिवर्गमपरं तथा
MBh 12.69.68
धर्मश्चार्थश्च कामश्च सेवितव्योऽथ कालतः धर्मेण हि महीपालश्चिरं पालयते महीम्
MBh 12.69.69
अस्मिन्नर्थे च यौ श्लोकौ गीतावङ्गिरसा स्वयम् यादवीपुत्र भद्रं ते श्रोतुमर्हसि तावपि
MBh 12.69.70
कृत्वा सर्वाणि कार्याणि सम्यक्संपाल्य मेदिनीम् पालयित्वा तथा पौरान्परत्र सुखमेधते
MBh 12.69.71
किं तस्य तपसा राज्ञः किं च तस्याध्वरैरपि अपालिताः प्रजा यस्य सर्वा धर्मविनाकृताः

🪷 The Honest Framing

This chapter belongs to the source-pinned BORI Critical Edition-derived digital witness. Its unique addresses are publicly readable and indexable; this remains a digital-witness claim, not a claim that every Mahābhārata recension agrees word-for-word or that the traditional 100,000-verse extent is represented here.

Navigation

Sources and Connected Readings

Continue from these 71 source-pinned Devanāgarī addresses to Śānti-Parva, the Mahābhārata reading map, and any exact Bhagavad-Gītā correspondence.

MBh 12.69local chapter route · Śānti-ParvaŚānti-Parvaparent Parva chapter index/mahabharata18-parva Sanskrit reading index with edition and address notesBhīṣma-ParvaMahābhārata Parva 6 · the Gītā lives in chapters 23-40MBh 6.23Bhagavad-Gītā chapter 1 in its Itihāsa homeMBh 6.40Bhagavad-Gītā chapter 18 in its Itihāsa homeRāmopākhyānaVana-Parva 258 · Vyāsa narrates the Rāma-kathā inside Krishna's epicNārāyaṇīyamŚānti-Parva 335 · Nārāyaṇa/Krishna/Viṣṇu/Vāsudeva unity witness/bhagavad-gitadeep Gītā corpus with translations, commentaries, and verse-level anchorsBG 1.1Dharma-kṣetra opening cross-anchored to MBh 6.23.1BG 18.66Carama-Śloka surrender seal inside the Bhīṣma-Parva arcVyāsa vibhūtiBG 10.37 · Krishna names Vyāsa among munisBG 10.37Vyāsa and Dhanañjaya as Krishna-vibhūti source routeŚB 1.2.11Brahman · Paramātmā · Bhagavān as one advaya-tattvaŚB 1.3.28kṛṣṇas tu bhagavān svayam · Vyāsa corpus source seal/binduDiamond of Darśanas · Itihāsa as one Bindu aperture/philosophyKrishna = Paramaatma = Parabrahman constitutional foundation

🪷 जय व्यास भगवान् 🪷